 ble fydd y Fflam Olympaidd yn ymweld?
Bydd y Fflam Olympaidd yn teithio o fewn awr i 95 y cant o bobl y DU, Ynys Manaw, Guernsey a Jersey yn ystod 70 diwrnod Taith Gyfnewid y Fflam. Bydd yn galluogi cymunedau lleol i ddwyn sylw at y gorau sydd gan eu hardal i'w gynnig - o dirwedd gyfareddol i ardaloedd trefol deinamig.
Gallwch weld y llwybr cyfan, yn cynnwys safleoedd dathliadau gyda'r nos, ymweliadau ag ynysoedd a mwy na 1,000 o gymunedau y bydd y Fflam yn teithio trwyddynt, ar fap Taith Gyfnewid y Fflam Olympaidd.
Cario'r Fflam Olympaidd
Ynghyd â'n Partneriaid Cyflwyno Coca Cola, Lloyds TSB a Samsung, mae Llundain 2012 yn dewis 8,000 o bobl ysbrydoledig ar hyd a lled y DU i gario'r Fflam Olympaidd - profiad unwaith mewn oes.
Nawr mae cynigion amodol wedi cael eu rhoi i'r rhai hynny sydd â straeon eithriadol, a bydd llefydd yn cael eu cadarnhau erbyn Mawrth 2012.
Bydd pob Cludwr y Fflam yn cario'r Fflam am tua 300 metr. Byddwn yn gwneud ein gorau i sicrhau y bydd pob Cludwr y Fflam yn cario'r Fflam yn, neu yn agos i'w ardal leol, fel y gall eu ffrindiau a'u teuluoedd eu cymeradwyo ar hyd y ffordd.
Bydd yn daith gyfnewid drwy gyfrwng y Saesneg a bydd angen i'r bobl fydd yn cymryd rhan allu siarad Saesneg elfennol.
Partneriaid Cyflwyno
Coca-Cola, Lloyds TSB a Samsung yw tri Phartner Cyflwyno Cyfnewid y Fflam Olympaidd. Bydd pob un yn helpu Llundain 2012 i recriwtio'r 8,000 o Gludwyr y Fflam fydd yn cario'r Fflam Olympaidd.
Hanes a thraddodiad
Mae gwreiddiau'r Fflam, y Dortsh a'r Daith Gyfnewid Olympaidd yn mynd yn ôl i'r Hen Gemau Olympaidd yng Ngwlad Groeg ac roeddent yn rhan bwysig o wyliau diwylliannol yr Hen Gemau.
Cynhaliwyd Taith Gyfnewid y Fflam Olympaidd am y tro cyntaf yn yr oes fodern yng Ngemau Berlin 1936 ac fe'i seiliwyd ar y seremonïau hynafol. Caiff arwyddocâd y ddefod - a'r alwad am heddwch - ei barchu hyd heddiw yn Nhaith Gyfnewid y Fflam fodern.
Cynnau'r Fflam
Cynhelir defod fanwl ar gyfer cynnau'r Fflam ym mhob un o'r Gemau. Caiff ei chynnau o belydrau'r haul yn Nheml Hera yn Olympia, Gwlad Groeg. Yn dilyn taith gyfnewid fer o gwmpas Gwlad Groeg, caiff y Fflam ei throsglwyddo i'r Ddinas Gynnal newydd mewn seremoni arall yn stadiwm Panathenaiko yn Athen.
Yna cludir y Fflam i'r Wlad Gynnal, ble caiff ei throsglwyddo o un Cludwr y Fflam i'r llall, gan ledaenu neges heddwch, undod a chyfeillgarwch.
Daw i ddiwedd ei thaith wrth i'r olaf o Gludwyr y Fflam gynnau'r crochan yn Seremoni Agor y Gemau Olympaidd yn y Stadiwm Olympaidd, gan nodi bod y Gemau wedi cychwyn yn swyddogol. Diffoddir y Fflam ar ddiwrnod olaf y Gemau yn y Seremoni Gloi.
